****** 2024.

أخي المبتدئ :
نلاحظ كثرة المربين في هذا المجال وهم في ازدياد ولله الحمد وهذا من صالح سوق النجد يكثر الطلب وتزداد القيمة ويستفيد الجميع،،،
لاكن احذر اخي المربي المبتدئ من الإستعجال في الشراء لكي لاتتأثر في بداياتك بشي يسمونه العامه (التخبيط) .
نلاحظ تحمس المبتدئين وسوماتهم العاليه في المنتدى وخارج المنتدى شفنا ناس يشرون نجد وفحوله وهي ماتصلح فحول للي يريد يقني الزين بمبالغ خياليه واذا سألته ليش شريته بهالقيمه قال ابوه فلان ولد فلان واخوانه وبناته الى اخره……غيرها من الفحول المعروفه ولا يقول ابوه مشراي او مسيوم بـ200000الف ولا بـ 100000 طيب ابسألك اخي العزيز انت تبي تشتري الرخل او الطلي ولا أبوه ومب كل إنتاج الفحول الغالية تصلح فحول ياما أنتجت فحولة مشهورة وغيرها ذبايح وخاصه اذا امهات عاديات واي فحل مهما كان طيب لابد من الامهات الطيبة المنتجة تحته ، ويجب عليك اخي المبتدئ التأني لان في التأني السلامة وفي العجلة الندامة والإستشارة والمعرفة بجميع المواصفات الجمالية والمادية للسوق لاننا ودنا الجميع يربح ماودنا لكم الخسارة وترى الخسارة في كل شي لابد منها لاكن بحدود المعقول وتعوضها بالمرة القادمة ان شاء الله ،،،
حتى بعض المربين المعروفين هدانا الله وإياه يستغل حماس المبتدئين ويعرض عليهم بعض الحلال اللي هو يدري ان مايستحق ان يفحل منه او ينتج منه ويستغل سمعته او سمعت فحل حلاله ويحده على المبتدئ بسعر عالي جدا وانا واعوذ بالله ما اقول لاتكسب ايها المربي الفاضل الله يرزقك لاكن لاتضر غيرك ويسر على اخوانك ويجب علينا التكاتف ونشر الهواية وتطويرها ولا يكون همك فقط السمعة والمال بل الترابط والتكاتف مع الجميع الله يجزيك خير عن أنس بن مالك رضي الله عنه عن النبي صلى الله عليه وسلم قال: (لا يؤمن أحدكم حتى يحب لأخيه ما يحب لنفسه) متفق عليه.
والله يرزقنا وياكم بالحلال الطيب ويغنينا بحلاله عن حرامه وبفضله عن من سواه.
م ن